• АҚ ЖЕЛКЕН
  • 19 Желтоқсан, 2020

Айкөркемнің айтқандары

Айкөркем қазір 6 жаста. Биыл мектепке барды, оқушы болды. Кішкентай болса да айтқан әңгімесіне үлкендер – біздер ауыз ашып қалатын кез көп. Оқырманға Айкөркемнің айтқандарын ұсынамыз.

Айкөркемнің қатар тұрған астыңғы екі тісі түсіп қалған. Бір күні тісшұқығыш ұстап жүр екен.
– Айкөркем, қай тісіңді шұқымақсың? – Мұндайда тосылатын ол жоқ.
– Менің басқа да тістерім бар, біріншіден. Екіншіден, мен әже емеспін (әжеміздің тісі түсіп жатыр). Үшіншіден, менің түскен тістерім қайта шығады.
Соны сұрап неміз бар еді деп отырмын.

***
– Таңшолпан әпке, бүгін сіздің қасыңызға ұйықтаймын, – деп Айкөркем мені құшақтады.
– Телефонымнан уай-фай тарата алмаймын, – дедім оның құшақтағанынан бір нәрсе сезіп.
– А-а, онда Ұлбала әпкемнің қасына кеттім.

***
– Әпке, неге бізбен бірге шай ішпейсіз?
– Шай ішкім келмейді... Жаным сол, менсіз іше алмай жатсыңдар ма?
– Жоқ, шай құятын адам жоқ болған соң айтып тұрмын.

***
– Әпке, құрт көзге кіріп кетсе не болады?
– Көз ауырады.
– Жоқ, құртқа не болады?
Ал енді жауап беріп көріңіздер.

***
– Әпке, аталарымыздың өлеңін айтып жарысайықшы.
– Қай аталардың?
– Абай, Ыбырай аталардың да. Мен бастаймын.
«Әсемпаз болма әрнеге,
Өнерпаз болсаң, арқалан.
Сен де бір кірпіш дүниеге,
Кетігін тап та, бар қалан...». Енді сіз айтыңыз.
– Қа-а-азір. Ойланып қалсам керек, Айкөркем шыдамай кетті:
– Тым болмаса, Абайдың қара сөзін айта салыңызшы.

***
Айкөркемнің алдында тек әпкелері бар.
– Айкөркем, сенің туғаның қандай жақсы, иә? Біз бәріміз осылай-осылай тұрмысқа шығып, кете береміз. Сен әке-шешеміздің қасында боласың.
– Әпке, мен де кетем ғой.

***
– Әпке, ішкі түйсік деген не?
– Бірнәрсені іштей қалап, сол істің дұрыс екенін біліп тұру.
– Онда менің ішкі түйсігім сізге «телефон бер» деп тұр.

***
Айкөркем сабақты қашықтан оқып жүр. «В» дыбысын өтіп жатырмыз. Мен мұғалімнің роліндемін.
– Во – лей – бол, – деп әр буынды айтқан сайын қол шапалақтаймын, – Сонда волейбол сөзі шығады.
– Әпке, балибол ғой бізде.

***
– Әпке, үлкен болған жаман ғой.
– Не үшін?
– Чупа-чупс жемейсің.

Таңшолпан Төлеген

«Ақ желкен» журналы, №12
Желтоқсан, 2020

117 рет

көрсетілді

0

пікір
Алдыңғы мақала Желтоқсан бірде...
Келесі мақала Табиғат аясында билеген балерина

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Редактор блогы

Балжан Мұратқызы

Бас редактор